Тиквешкиот регион со своите плодни почви, поволна клима и квалитетно грозје, постојано ни дава насоки кон нови винарии и дестилерии, но понекогаш патот не носи и кон оние кои започнале со работа пред неколку години, а сега нижат многу успеси. Семејната винарија Бошков, на тимот на кајак.мк ни е добро позната од нивните почетоци. Нивната приказна со гордост и чест е дел од нашата платформа. Со сопствени лозови насади и традиција која се негува петта генерација, Горан најдобро знае да ни раскаже за производството на добро вино, маџун, ракија и мастика. Во последните години тие се фокусираа кон учество на вински натпревари, во кои со задоволство ги истакнаа своите сорти на вино, во одлични шишиња со прекрасен дизајн. "Минатата година нашата семејна винарија го имаше првото меѓународно претставување во Белград на Wine Vision by Open Balkan. Каде што нашиот Deep Dark Vranec Barrique се закити  со Сребрен Медал, додека Темјаниката со Бронза." - ни раскажа Горан, со чаша вино и прекрасни фотографии.