Луѓето кои се приклучуваат на листата на Кајак.мк како локални херои кои прават мали нешта од огромно значење за развојот на туризмот се „Jeep Safari Galichica“.

Ние ќе ве запознаеме со Ристе Николовски кој е дел од целиот тим на луѓе кои ја претвараат Галичица во авантуристички парк.

Ристе ни раскажува дека причината која ги поттикнала да започнат со организирање на ваквите тури е љубовта кон природните убавини на Националниот парк Галичица. Отсекогаш размислувале како тие убавини да им ги престават на странците кои го посетуваат Охрид, а сето тоа преставување да биде на еден уникатен начин.

Се одлучиле да организраат сафари на Галичица, од причини што националниот парк поседува асфалтирани и неасфалтирани патишта и сето тоа може да се искомбинира во интересна авантура.

Ристе вели дека се вози по планински асфалтирани и неасфалтирани патишта, по скоро цела должина на националниот парк. За време на екскурзиите гостите може да го погледнат Охридското и Преспанското езеро од  височините на Галичица. „Тоа е како да го гледате светот на дланка“, вели Ристе.

Запрашан за тоа кој е најважниот момент на турите, Ристе додаде дека прекрасните пејсажи и разновидноста на растителниот, а и животински свет се нешто кое мора секој да го доживее. Галичица е еден од најубавите паркови во Македонија. Таа крие многу тајни, многу уникатни места и секако чист воздух.