Го напуштивме градот и се преселивме на село: Така започна нашата приказна наречена „Шумска Градина“

Убавите и позитивни приказни за луѓето кои останале во Македонија и одлучиле да инспирираат млади секогаш ќе бидат во главен фокус на Кајак.мк. Нашето постоење е со цел да им дадеме поддршка на ваквите локални херои кои треба дефинитивно да бидат дел од светот на туризмот. Дали знаете зошто? Затоа што вкусот на зеленчукот од нивните градини и од супермаркет не е ист!

Денеска ќе ви ја раскажеме приказната на „Шумска Градина“. Сакаме да ве запознаеме со Мартин и неговото семејство – локални херои на органското земјоделство во Македонија кои пред десет години, решиле да го остават градскиот живот зад себе, да ги спакуваат кучињата и мачињата и да се преселат на село. Така започнува нивната приказна наречена Шумска градина – семејна, домашна и сертифицирано органска градина која го носи вкусот на природата директно до вашиот дом, а која од денеска е дел од светот на Кајак.мк

Секое утро во градината е нов предизвик. Мартин и семејството со љубов го одгледуваат секој зеленчук, внимателно го берат и го носат до своите муштерии. „Најубавото е што можеме да живееме и работиме заедно како семејство и да гледаме среќни луѓе кога го добиваат нашиот зеленчук“, вели Мартин.

Предизвиците се дел од секојдневието – од природните непогоди, до обезбедување вода и справување со институции. Но, со трпение, упорност и љубов кон земјата, тие успеваат да ја одржат својата градина и да создаваат храна каква што денес тешко се наоѓа – здрава, органска и со вкус кој се чувствува во секој залак.

Шумска градина не е само зеленчук – тоа е животен стил кој промовира вистински вредности: грижа за природата, минимализам, семејство и заедница. Мартин верува дека тоа е патот кон живот кој вреди да се живее, и пример за сите млади кои сакаат да се вратат кон природата.

Во иднина, Шумска градина се надева на поголемо производство и повеќе фамилии кои ќе уживаат во нивниот зеленчук, но и на заедница од локални производители кои ќе се поддржуваат и инспирираат едни со други.

Мартин порачува: „Не влегувајте во ова ако мислите само на пари. Водете се од љубовта кон природата и желбата да создавате нешто вистинско. Тогаш ќе го почувствувате вистинското задоволство.“ Шумска градина покажува дека локалните херои не се секогаш оние што ги гледаме во филмовите – понекогаш се оние кои секој ден со љубов и труд одгледуваат храна за заедницата.

Од денеска, „Шумска градина“ е дел од категоријата на атракции која наскоро ќе може да резервирате како уникатно искуство.