Моето прво бакарно дело „Винова лоза“ ми ги отвори хоризонтите

Убава и скромна приказна ни раскажува Данче Наумоска, жената која од денеска е дел од нашата листа херои кои прават мали нешта од огромно значење во развојот на туризмот во Македонија.

Данче живее и твори во Охрид, градот Ерусалим на Балканот. Скоро 20 години се занимава со изработка на накит и украсни дела од бакар,  занает кој го наследила од нејзиниот татко.

За себе вели дека не е човек кој сака да користи многу зборови кога треба да се опише себе, туку остава делата да зборуваат за неа. Нејзиниот став е дека кога човек создава нешто значајно, остава тоа дело да сведочи за неговиот идентитет, потекло и традиција, бидејќи таквата скромност е одлика на големите луѓе.

Незините почетоци во ова професија датираат уште многу одамна. Љубовта кон создавањето на бакарни производи и ја пренесува нејзиниот татко додека уште како мала ја посетува неговата работилница. Данче се сеќава дека во тоа време најмногу ја привлекувале боите на бакарот при неговата хемиска реакција- оксидација, а се сеќава и на нејзините почетоци пред 20 години кога со чеканче во рака, неколку алати од нејзиниот татко и едно парче бакар го изработува нејзиното прво дело „Винова лоза“ со намера да го украси домот. Од тогаш па до денес, трпеливо и посветено ја испишува нејзината животна приказна, наречена „Бакарна Бајка“.

„Работата е мое задоволство. Ова е креативна работа која мене лично ме исполнува и ме прави среќна и задоволна“, вели Данче.

Таа додава дека работата со бакарот и ја отстранува негативната енергија и ја исполнува душата. Во работилницата има тивка музика која и пружи комплетно задоволство и мотивација да создаде нешто ново.

Изработките се нејзиниот авторитет и најголема инспирација, а како слаба страна ги истакнува оние неоткриени нешта, кон кои е во постојано трагање.

Данче ни раскажува дека Римјаните од 6ти до 3ти век п.н.е.користеле бакарни грутки како пари, а потоа се лиеле бакарни пари. Во Македонија во дамнешно време во домаќинството најмногу се користеле бакарни садови, а за свадби се подарувало бакарни тепсии кои биле највреден подарок. Ова е нешто кое таа сака да го продолжи, а со тоа и да ја зачува традицијата на македонскиот народ. 

Данче имала многу клиенти кои имале разни желби и очекувања од неа за да се изработат некои конкретни дела кои тие ги барале од неа. Постојано добивала коментари дека тоа што таа го работи е совешено добро и дека тоа се безвременски дела кои заслужуваат почит.

Најголема поддршка добива од нејзините синови, а исто така и од сопругот кој секогаш и е десна рака околу монтажните работи.

Нејзините дела може да ги погледнете на инстаграм профилот со еден клик ОВДЕ.

Фејсбук профилот со нејзините креации може да најдете со еден клик ОВДЕ.