Се одлучив да произведувам рачно и уникатно, тоа го ценат луѓето со животен стил

Кога ќе поминете преку Битола или пак кога ќе престојувате на Пелистер во некоја од вилите кои ги има на Кајак.мк, наш совет е да скршнете во битолскиот „Мал Безистен“ каде ќе ја најдете занаетчиската работилница и ателје на Надица. Девојката која од денеска е дел од нашата листа на локални херои кои прават мали нешта од огромно значење за развојот на туризмот.

Надица е битолчанка, а за себе вели дека е нетрпелив оптимист кој има оригинални идеи. Се одлучила да се посвети на креативноста, а главен акцент да и биде модата, која ќе ја пропагира на свој уникатен начин.

Големата желба и е главната мотивација да отвори свое ателје кое го именува како „Креација“, а за кое катче вели дека ѝ помага да биде своја и да твори на начин на кој таа сака. Сите производи ги изработува рачно, а за нив вели дека се единствени и уникатни. Има изработено повеќе колекции на накит, а секоја колекција си има своја приказна од моментот на инспирацијата.

На пример, Надица вели дека колекцијата „Златен век“ е инспирирана од Македонското културно наследство, од златото на Лихнитида, а најновата колекција „Танго“ е инспирирана од разни видови танци.

Безистенот во Битола е место кое ќе ве врати низ историјата, а во таков стил е и ентериерот на нејзиното ателје. Место кое ја инспирира и ја поттикнува да биде креативна.

Вели дека во нејзиното ателје има место за секого кој сака да научи како се произведува рачен накит. Секој кој е заљубен во уметноста е добредојден овде, бидејќи како што вели таа, уметноста е емоција која се пренесува и рефлектира.

Нејзините производи може да ги најдете и на фејсбук страницата: kreacijajewelry