Работата со дислексија се базира на АФС методот (Auditiv, Funktional, Symptomatisch), кој претставува научно базиран и холистички пристап насочен кон развој на когнитивните и перцептивните способности.

Методот потекнува од Австрија и е развиен во соработка со Dyslexia Research Center (САД) и д-р Астрид Коп-Дулер. Сертификацијата за работа по овој метод е стекната преку Erster Österreichischer Dachverband Legasthenie (www.legasthenie.at), каде се обучуваат стручни АФС тренери.

Пристапот се темели на работа во три меѓусебно поврзани области: внимание, сензорна и когнитивна перцепција, како и читање и пишување. Наместо фокусот да биде исклучиво на симптомите, се работи на нивните основни причини, како што се аудитивната обработка, вниманието, меморијата и начинот на кој информациите се процесираат.

Целта на програмата е создавање стабилна основа за учење, развивање поголема самодоверба и овозможување самостојно и успешно функционирање во образовниот и секојдневниот живот. Во текот на процесот се постигнува подобрување во читањето, пишувањето и разбирањето, како и значително зголемување на концентрацијата, меморијата и организацијата при учење, со истовремено намалување на фрустрацијата и грешките.

Работата се реализира со деца, тинејџери и возрасни, при што пристапот секогаш се адаптира индивидуално според возраста, потребите и целите на клиентот. Најчесто корисници се ученици од основно образование.

Процесот започнува со детална иницијална проценка преку која се идентификуваат специфичните предизвици и потенцијалите на клиентот. Врз основа на добиените резултати се изработува индивидуален план со структурирани вежби насочени кон развој на основните когнитивни функции. Работата се одвива континуирано преку редовни сесии и систематско следење на напредокот, а еден циклус најчесто трае од 6 до 12 месеци, во зависност од почетната состојба и интензитетот на програмата.

Во пракса се забележува значително подобрување во читањето, разбирањето и учењето, но и во начинот на кој клиентите пристапуваат кон секојдневните обврски. Со текот на процесот читањето станува појасно и посигурно, концентрацијата и фокусот се зајакнуваат, а учењето станува поорганизирано и поефикасно. Дополнително се развива меморијата, се намалува фрустрацијата поврзана со учењето, а самодовербата и мотивацијата значително растат. Особено важно е што кај децата се унапредува фонетската и фонемската свесност, како и комуникациското изразување, при што стануваат посигурни, поотворени и посамостојни во училишниот процес.

Она што го издвојува овој пристап е долгогодишното практично искуство и индивидуалната работа со секој клиент, со фокус на долгорочни резултати, а не само краткорочни подобрувања. Дополнително се применуваат и техники за брзо читање и учење (Power Reading), воведени во Македонија во 2008 година, кои придонесуваат за побрзо и поефикасно усвојување на вештините.

Процесот на соработка започнува со иницијална консултација, по која следи проценка и изработка на персонализиран план за работа.