Македонија има своја рајска долина која вреди да ја посетите

Гастрономското патување на Кајак.мк низ Македонија продолжува во регионот на Охрид. Охридскиот регион не е само езеро и историја. Регионот може да се пофали со недопрена природа, здрава и вкусна храна и уникатни приказни на локални херои кои својот живот го посветиле градејќи нешто автентично на природата.

Она со кое денеска ќе ве запознаеме е дел од нашата листа на дестинации за еко тим-билдинг патувања кои започнавме да ги организираме, а кои патувања вреди да им ги понуди секоја компанија на своите вработени. За оние кои се уште не аплицирале за тим-билдинг патување, тоа може да го сторат со еден клик ОВДЕ.

На само 15 километри од патниот правец од Охрид кон Ресен и на 3 километри пред селото Куратица се наоѓа рибниот ресторан „Рајска Долина“. Тимот на Кајак.мк разговараше со Зоран и Тони. Двајца страсни рибари, кои љубовта кон спортот ги поттикнала да отворат свој рибарник изграден од лесни и природни материјали кои ќе се вклопат со природата.

Рибниот ресторан работи седум години по ред и исклучиво во летниот период. Сезоната им започнува до месец мај и трае се до октомври пред да започнат обилните врнежи и студот.

Зоран вели дека големата желба кон рибите и риболовот ги поттикнала да отпочат свој бизнис преку кој ќе одгледуваат риба, а подоцна и ќе ја продаваат во свој ресторан. Пред цели 10 години започнале со градење на рибникот, а летниот ресторан го изградиле две години подоцна.

Местото на кое е изграден рибникот е погоден за чување риба. Чиста вода од самите извори кои се во непосредна близина и недопрената природа се причината поради која стекнуваат редовни гости.

Тие велат дека најголеми комплименти добиваат од странските туристи кои ретко искусиле таква природа и кои го искористуваат денот да уживаат покрај течението на реката.

Од месо се служи исклучиво риба и тоа Охридска пастрмка, речна пастрмка и крап. Поради тоа што самиот рибник се наоѓа на река која е на охридско сливно подрачке, законски е забрането одгледување на друга риба.

Доколку гостите имаат желба може сами да уловат риба, особено на рибникот/езерото за крап кој преставува вистинска атракција.

Порај рибата, се служат и стандардните самати и овчото сирење од селото Плаќе.

За рибниците и рибите потребна е грижа во текот на цела година. Одвојување на големите од малите риби, хранење, чистење и оддржување, вели Зоран. Но додава дека покрај рибите редовни другари им се и патките, кокошките и зајаците кои ја уживаат природата и бенефитите од местото.

Рибникот „Рајска долина“ може да го најдете во нашата нова база „Гастрономија“ каде ќе најдете локација и директен контакт од домаќините. Повеќе инфо со еден клик ОВДЕ.