Престојувајте на фарма: Опколени со кози и градина со разни градинарски култури

Природа, шума, неколку викенд куќи, патеки за прошетки, летниковец, градинарски култури, домашни животни -куче, мачки, кози... се само дел од причините кои треба да ве поттикнат да престојувате во „Хостел Твин“, ни набројува домаќинот Тихомир.

Вгнездено во ридовите на малото село Орешани, ова сместување ќе ве врати назад низ времето и преку примери ќе Ве запознае со начинот на кој живеат луѓето во руралните средини. Домаќинот Тихо кој ги отвори вратите на „Твин“ за Кајак вели дека овој објект бил фарма за печурки, денес е претворена во шармантна рустикална куќа за гости.

Околината е прекрасна за прошетка, особено во пролетните и летни денови кога се е зелено и расцветено. Сместувањето нуди прекрасен поглед од дрвениот балкон каде може да го пиете кафето подготвено од домаќинот или пак можете да уживате со чаша свеж и ладен козји јогурт.

Она што го прави уникатно ова сместување е фактот дека истото е „pet-friendly“. Самиот домаќин одгледува разни животни во околината. Чува и одгледува кози, со чие млеко подготвува вкусни здрави појадоци кои можете да си ги дозволите по симболична цена.

Градината која е пре самиот објект е идеална да ги прошетате вашите деца и да ги запознаете со градинарската култура, бидејќи можеби тоа ќе им биде причината да се одлучат да го напуштат градот и да се преселат на село.

Во непосредна близина на сместувањето има термална бања, а на 4 километри е археолошкиот локалитет „Таор“. Доколку сакате повеќе информации за сместувањето, фотографии и контакт за резервација, кликнете ОВДЕ.