Ранч со базен и животни за добро друштво

Она што постојано настојуваме ние во Кајак е да ви докажеме дека и во Македонија има уникатни и несекојдневни места кои можете да ги посетите, да слушнете нови приказни, да уживате на поинаков начин од оној досега вообичаениот.

Нашата локална хероина Марија Дуда, за која сме зборувале и трубале многупати, секогаш е позитивна да сподели нови моменти со нас и да нè освежи со новитети во нејзиниот ранч.

Ако Мариjа на почетокот ранчот го стартуваше со неколку животни, денеска во простран двор може да се најде една цела “војска“ преслатки животни со кои можете да уживате покрај базен, да ги галите додека читате книга, да ги храните додека и вие ручате во дворчето и ред други активности.

Приказната на Марија допре до многу наши патувачи, Многумина од нив ја прифатија приказната каква што сака Марија да ја раскажува, со фокус на љубов кон животните, природата и секако активниот туризам.

Ранчот на Марија се наоѓа во околината на Ранковце, веќе повеќе од една година е дел од нашиот свет, а досега сме организирале и тим-билдинг каде Марија се покажа како одлична домаќинка.

Најважно од се е гостите кои ќе се одлучат да присуствуваат овде да бидат љубиели на животни или со еден збор да ги сакаат животните.

Овде животните слободно се шетаат, уживаат, се дружат со гостите, овде ранчот е свет во кој сите се еднакви.

Она што особено ни е драго е фактот дека Марија организира отворени денови за сите ранливи категории граѓани, деца со посебни потреби и деца кои заслужуваат да бидат среќни кога се во придружба со животните. Тоа е факт што за нас ранчот „ The Countryside“ е вистински општествено одговорен ранч.

Дали би замислиле еден ден покрај барот каде се служат пијалоци, уживање во базен, а околу вас козите љубопитно набљудуваат како да ви го испасат „Мохитото“? Доколку сакате повеќе информации и контакт за резервации, кликнете ОВДЕ.