Ги промовирам пештерите во Македонија за развој на активниот туризам

Ако започнеме да го пишуваме списокот со имиња заслужни за развојот на туризмот во Македонија, на тој список дефинитивно ќе се најде Дарко Неданоски, член на СК Златоврв.

Дарко ја истражува и промовира Македонија од еден поразличен агол, за кој агол вели дека многу повеќе се заинтересирани странските туристи отколку самите ние. Тој е спелеолог или поедноставно кажано човек кој се занимава со проучување на пештери или други природни подземни простории.

Позади себе има еден куп успеси. На само 18 години се стекнува со титулата спасител од учеството на низа обуки во Бугарија.

Има нанижено повеќе рекорди, почнувајќи од екседицијата во Словенија и Хрватска каде заедно со Марио Андоноски достигнуваат 534 метри во Пропаста Брезно на Лешките планини, па се до најголемиот рекорд за македонски спелеолог со 950 метри под земјата и четири дена без дневна светлина во Словачка јама.

Дарко вели дека Македонија иако е мала на површина, има многу што да покаже. Интересот кај странските туристи е доста поголем во споредба со домашните. Неговиот клуб добива повици од луѓе од целиот свет, како за посета и туристичко уживање, така и за посебни научни истражувања и експедиции.

Поради тоа што тие во моментот работат на кампања за промоција на македонските пештери во најдобро светло, нашиот тим го става Дарко и сите во клубот на листата на херои кои прават мали нешта од огромно значење за развојот на туризмот во Македонија.

Тргнувајќи од фактот дека пештерите се недопрена природа и дека на многумина им се вистинско задоволство да ги посетат, може да заклучиме дека во Македонија има огромен туристички потенцијал, вели Дарко. Македонија има многу пештери кои навистина ви го одземаат здивот и се дозволени за посета и развој на туризмот. Други пак, се од огромно значење за науката и треба максимално да ги заштитиме.

(ФОТОГРАФИЈА НАПРАВЕНА ПОСЛЕ 4 ДЕНА БЕЗ ДНЕВНА СВЕТЛИНА)

Во моментот промоцијата ја спроведуваат користејќи ја моќта на социјалните мрежи, а комуницираат и со Спелеолошката Федерација на Македонија, каде се поврзуваат со клубови од целиот Балкан за европски соработки. Најдобра промоција постигнале преку Отворените Денови на Спелеологијата, каде доаѓаат голем број посетители.

Оваа година СК Златоврв ќе ја организира првата прилепска спелеолошка експедиција, именувана како Спелеолошка експедиција „Солунска 2021“. Преку ова експедиција ќе се обидат да откријат нови пештерски канали и потенцијално нова, поголема длабочина од досега објавената длабочина од 370 m.

Солунска Глава 5 има големи наслаги на постојан мраз (најголеми од ваков тип во Југоисточна Европа) и претставуваат еден вид подземен ледник/глечер во Македонија, кои како дел од експедицијата, за прв пат ќе бидат детално мапирани, а ќе бидат земени и примероци за понатамошни подетални научни истражувања.

Овие ледени маси се од особено значење, особено како архива на климатските прилики на овој простор. Со оглед на тоа дека во изминатата декада е забележано топење на ледените маси во пештерите низ Европа, од особено значење е да се направи детално истражување на овие наслаги во Солунска Глава 5 пред тие целосно да се стопат. Организирањето на првата прилепска спелеолошка експедиција ќе има огромно значење за развојот на спелеологија и промоцијата на пештерите во Македонија.

Тимот на Дарко сам по себе е посебна приказна и доживување. Тие организираат авантури кои никогаш нема да ги заборавите. Покрај пештерите, практикуваат и многу други активности на отворено кои Кајак честопати ги потенцира како приоритетни за активниот туризам.

Како што и Дарко потенцираше на почетокот на текстот, Македонија нуди огромен број места за да се посетат, меѓу другото и голем број пештери. Најважно од се е сите да ја чуваме природата.

За нивните активности можете да дознаете многу повеќе на:
Инстаграм: @skzlatovrv
Фејсбук: https://www.facebook.com/skzlatovrv/
Интернет страница: www.zlatovrv.speleo.mk