Ѓорѓи Митревски организира еднодневни пикник тури на 1900 метри надморска височина

Дали се сеќавате на вила „Forest“ која се наоѓа скриена на Мавровското езеро помеѓу високата шума. Кајак.мк ве запознава со сопственикот на вилата која може да ја резервирате приватно, а кој воедно организира и достра атракции во околината за своите госи.

Ѓорѓи Митревски е скопјанец кој со својата „Лада Нива“ која работи на плин и не ја загадува околината организира еднодневни „Off Road тури“ низ прекрасните планински предели на Бистра, Шара и Кораб.
Турата започнува од Маврови Анови каде гостите може да бидат сместени во неговата „Forest“ вила за која пишувавме пред некој ден. Потоа возејќи по патот кон Галичник, на Царевец се скршнува над скијачките терени, па се продолжува по планински пат преку бескрајните пасишта на Бистра.

Патот води низ неколку бачила а глетката асоцира на море од зелени врвови населени со стада овци. Пауза за пикник тој организира на планинските врвови со 1900 метри надморска височина каде во зависност од сезоната може да се собираат чаеви, печурки, боровинки и други шумски плодови.

По оброкот и починката, турата продолжува низ буковата шума по течението на прекрасната планинска река која се спушта кон Лазарополе, од каде повторно се приклучува на асфалтниот пат кон реката Радика, по чие течение се посетува и Бигорски Манастир и Куќата на Мијаците за кафе пауза.

Турата трае околу 6-7 часа, а е одлична за запознавање на целиот регион, особено за луѓето кои не се активни спортисти и не се во можност преку планинарење или со велосипед да ја истражат планината.