Израснавме со коњи, а денеска тие ни се наш извор на финансии

Ако пребарувате на светски туристички платформи за тоа што би правеле во Македонија во Јуни, добиете многу предлози поврзани со тури со коњи. Секој странски турист кој ја посетил Македонија и се одлучил да појде на тура со коњи вели дека тоа му помогнало да ја доживее земјата на еден поинаков начин.

Ако не прашате нас, кое е најдоброто време за ваквите тури, нашиот одговор ќе биде: ДЕНЕС!

Летото во Македонија има своја предност. Зелените планини, топлото сонце, зеленчукот и овошјето кои растат под нашето поднебје и топлиот гостопримлив народ кој може да ви организира доста интересни еднодневни авантури ширум државата се само дел од аргументите на нашиот одговор.

Денеска ќе ве запознаваме со уште еден наш локален херој. Халил Џемаили е млад човек кој од денеска е дел од базата на луѓе кои прават мали нешта од огромно значење во развојот на туризмот во Македонија.

Халил поседува фарма на која се одгледуваат околу 50 коњи. Тој ни раскажува дека светскиот тренд на јавање коњи го поттикнува да започне да се занимава со организирање на тури во западниот дел на државата. Според него, жално е убавината на Шара да не биде прикажана на што е можно поголем број туристи.

Од тие причини, тој заедно со неговата фарма пред три години одлучиле да отпочнат со тренирање на дел од коњите токму за ова намена. Денес, тие организираат разни тури на туристи од Македонија и странство.

Неговиот тим е именуван како „Horse Riding 1th of May“ и често може да се сретне во околината на црквата на Попова Шапка, бачилата на Шипковица, локалитетот Јелак, бачилото „1-ви Мај“ на Целипашина, Лешница, Боговинско Езеро и други локалитети кои ќе ги посакат туристите.

Покрај турите, Халил вели дека битни се обуките кои ги држат за јавање коњи. Секој кој ќе се реши да се приклучи на нивните тури, претходно ќе добие кратка обука, а исто така ќе добие и опрема како кацига и чизми за јавање. На долгите тури, како што е турата до бачилото „1-ви Мај“ присутните добиваат и бесплатен ручек.

Турите ги организатаат четири млади и искусни момчиња кои целиот свој живот го поминале во работа со коњи. Коњите кои ги поседуваат се доста мирни и се од раса која потекнува од овој крај. Според Халил, тие се добро истренирани да движат по сите патеки кои се дел од нивната понуда.

Тој е среќен што интересот кај туристите од година во година се повеќе расте. Ова им е трета година, а за овој краток период добиле многу туристи од Албанија, Косово и Бугарија.

Халил ги кани сите заинтересирани да го контактираат на телефонскиот број: 076 266 026, бидејќи како што вели тој, само различностите и пријателствата ќе ја изградат вистинската слика за Македонија.