Велешанецот Давор е еден од ретките пирографичари во регионот

Тимот на Кајак.мк продолжува со промоцијата на локалните херои во Македонија, за кои велиме дека се еден од главните столбови на туризмот. Доколку сакаме туризмот да се движи во права насока, не смееме да ги изоставиме нивните приказни кои се мали но од огромно значење во развојот на оваa гранка.

Денеска ве водиме во градот Велес, каде низ тесните улички се шири миризбата од работилниците на старите занаети кои со години го одржуваат духот на трпението, волјата и смиреноста во креирањето на нови ракотворби.

На едно од велешките сокачиња, го запознавме човекот со редок занает на денешнината, а токму тој е нашиот нов локален херој чија приказна заслужува да биде дел од Кајак.мк.

Сакаме да ве запознаеме со Давор, велешанецот кој успева љубовта кон уметноста и природата да ги спои во една ретка техника наречена „Пирографија“, која претставува цртање на дрво со негово горење.

Давор потекнува од Велес и љубовта кон уметноста ја негува уште од детските години. Во историјата на неговото семејство се среќаваат занаетчиството и уметноста во различни облици – од  изработка на мебел и предмети од дрво до копаничарство.

Во текот на годините тој успева љубовта кон уметноста и природата да ги спои во една техника која денеска ретко кој ја усовршува на овие простори.

За Кајак.мк вели дека со пирографија се занимава од тинејџерските години, како хоби. Тој е самоук пирограф, кој постепено ги зајакнува своите вештини.

Пред околу две години неговото хоби добива подлабока страст која го поттикнува да започне со поинтензивно усовршување, за денеска, да се изгради во одличен уметник чии дела ќе красат многу простории.

Без разлика што ваквите дела се изработуваат на дрво, Давор вели дека е голем љубител на природата и шумата. Токму поради ваквата конекција чувствува должност да потенцира дека делата се изработуваат на суви дрва, на кои им завршил животниот век. Убавината на пирографијата како професија е тоа што им го продолжува животниот век на сувите дрвца и ги прави да останат живи засекогаш.

„Процесот започнува со обработка и обликување на дрвото. Најдолго време одзема цртањето и завршува со лакирање и заштита на дрвото, вели тој и додава дека во зависно од темата и димензиите потребно е различно време за изработка, од најмалку три до четиринаесет дена за едно ремек дело.

Давор изработува слики на најразлични теми, а најчесто сликите ги изработува по нарачка. Најголем интерес има од лица кои сакаат да подарат нешто уникатно и ретко. Денеска, работи на проширување на асортманот на производи, така што изработува ноќни ламби и различни украсни предмети.

Дел од неговите дела наскоро ќе бидат достани во Бакалницата на Кајак.мк, дотогаш можете да стапите во директен контакт со Давор на 072/266-889