Габриела и Предраг се македонците кои создаваат биоразградливи предмети: Предлог за подарок

Тимот на Кајак.мк и во 2026-та година продолжува со својата мисија, а тоа е да ве запознае со сите локални херои од Македонија кои прават мали нешта од огромно значење за туризмот, локалната економија како и природата. Денеска сакаме да ви ја раскажеме приказната на Габриела и Предраг. 

Во малата работилница на Габриела и Предраг, секој ден се создаваат уникатни 3D декорации кои ги носат нивната визија за одржливост и креативност во домовите на клиентите. Simple Design е семеен бизнис што се разликува од масовното производство – секој производ е внимателно дизајниран и направен од биоразградливи материјали.

„Нашата идеја се роди спонтано, како начин да експериментираме со дизајн и нови технологии“, објаснува Габриела. „Она што започна како хоби, брзо прерасна во мал бизнис со јасна визија – да создадеме модерни, одржливи и уникатни декорации што ќе најдат своето место во секој дом.“

Првите производи беа мали серии на уникатни 3D декорации, претставени на локални базари, хуманитарни настани и еко саеми. „Секој дизајн е предизвик – не е лесно да се натпреваруваш со масовното производство, но веруваме дека луѓето го ценат рачно изработениот, автентичен дизајн“, додава Предраг.

Денот на тимот од Simple Design е комбинација од креативност, организација и трпение. Голем дел од времето се посветува на осмислување и усовршување на нови дизајни, дел на следење на процесот на 3D печатење, кој понекогаш трае со часови, а паралелно се одговара на прашања на клиенти и се подготвуваат нарачки.

„Ниту еден ден не е ист. Токму таа разновидност нè мотивира“, велат тие.

Најголемата радост е кога еден производ, од дигитален концепт до физички предмет, го наоѓа своето место во домот на клиентите. „Тоа не е само продажба. Тоа е потврда дека трудот, љубовта и одржливиот пристап имаат смисла“, објаснува Габриела.

Во целиот процес, најголема поддршка им доаѓа од семејството и пријателите, кои од самиот почеток верувале во нивната идеја. Дополнителна мотивација доаѓа од инстаграм заедницата и други мали бизниси, кои преку охрабрувачки пораки и искрен интерес ги потврдуваат дека се на вистинскиот пат.

Simple Design тежнее кон создавање производи со долг животен век, изработени од одржливи материјали, со процес кој генерира минимален отпад. Тие веруваат дека 3D печатењето е алатка која може да помогне во намалување на прекумерното производство и да го промовира одржливиот избор кај купувачите.

Плановите на Simple Design вклучуваат проширување на понудата со нови колекции, експериментирање со иновативни материјали и покомплексни дизајни, како и зацврстување на позицијата на меѓународните 3D пазари. Целта е брендот да стане синоним за автентичност, квалитет и одржливост.

„Верувајте во вашата уникатност и не плашете се да започнете“, велат Габриела и Предраг. „Бидете транспарентни со публиката, покажувајте го процесот и не се откажувајте од квалитетот. Автентичноста е единственото нешто што трајно ќе ве издвојува.“

Со Simple Design, секој производ е повеќе од декорација – тоа е малиот, но значаен чекор кон поодржлива иднина.