Организиравме незаборавен тим-билдинг со кино под отворено небо и вечера на Св.Заум

Тимот на Кајак.мк имаше чест да организира уште еден уникатен тим-билдинг настан во Охрид, исполнет со автентични локални искуства и моменти кои долго ќе останат во сеќавање. Особено ни е драго што токму вработените од компанијата IWConnect добија можност да бидат дел од едно поинакво доживување, создадено далеку од секојдневната канцелариска рутина.

Охрид е дестинација која речиси секој ја посетил барем еднаш. Но, токму тоа е нашиот предизвик – да покажеме дека овој град секогаш може да се открие одново, преку нови приказни, различни локации и автентични искуства. Дури и кога организирате повеќе настани на истото место, секој може да биде единствен.

Доколку и вашата компанија има потреба од тим билдинг патување, можете да ни испратите барање со еден клик ОВДЕ.

Компанијата IWConnect ја препознава вредноста на ваквите искуства и континуирано вложува во создавање незаборавни моменти за своите вработени. Благодарение на нивната доверба, Кајак.мк реализираше концепт кој спои природа, гастрономија, култура и забава.

Првиот дел од програмата беше резервиран за магична филмска вечер под отворено небо во дворот на Пирустија Неданоски во селото Рамне. Просторот, кој преку ден е познат по традиционалните Cooking Classes организирани од нашата домаќинка Наташа, а со зајдисонцето се претвори во романтично кино на отворено. Под ѕвезденото небо, со мирисот на природата и уникатниот амбиент, гостите уживаа во филмска проекција каква ретко се доживува.

Вториот дел од вечерта беше резервиран за едно од најексклузивните искуства што Кајак.мк ги организира на Охридското Езеро – приватна вечера во комплексот на црквата „Св. Богородица“ – Заум. Посебна чест ни претставува фактот што ова беше првата организирана група на која домаќините дозволија вечерта да биде збогатена со жива акустична изведба на традиционална македонска чалгиска музика.

Во амбиент исполнет со спектакуларно зајдисонце, локални гастрономски специјалитети, внимателно одбрани македонски вина, звукот на езерото и мелодиите на чалгијата, гостите имаа можност да уживаат во едно навистина несекојдневно искуство. А враќањето со охридските катамарани во последните зраци од сонцето беше совршеното финале на денот – момент кој засекогаш ќе остане дел од нивните спомени.

Токму ваквите приказни се причината поради која Кајак.мк продолжува да создава автентични туристички и корпоративни искуства низ Македонија. Наместо класични тим-билдинг настани, нашата цел е секоја компанија да добие доживување кое ќе ги зближи луѓето, ќе ги инспирира и ќе им подари спомени што ќе ги раскажуваат долго по завршувањето на настанот.

На крај, останува само искрено да ѝ се заблагодариме на компанијата IWConnect за укажаната доверба и можноста заеднички да реализираме уште една успешна приказна.