Христина: „Јогата ме подготви, но планината ме разбуди“

Честопати велиме дека природата е најдобриот лек, но кога на тоа ќе додадете свесно дишење и јога движења, добивате формула за целосна преродба. Денеска ве запознаваме со Христина Јорданоска, девојката која својата десетгодишна посветеност на личниот развој ја преточи во инспиративни јога и хајкинг тури низ македонските планини. Причитајте уште една приказна за наша локална хероина која од денеска е дел од светот на Кајак.мк

Христина не е само ентузијаст; таа е сертифицирана јога инструкторка по Хата јога, терапевтска јога, а ги предава и вештините на Крија Хата и интегралната јога. Веќе 8 години активно го споделува своето знаење со другите, верувајќи дека секој од нас носи уникатен талент кој треба да го сподели со светот.

„Споделувањето на стекнатото знаење и сведочењето на трансформацијата кај луѓето му дава смисла на моето постоење. Сите имаме некаква способност со која можеме да им помогнеме на другите, а токму со тоа споделување јакнеме сите заедно“, вели Христина за Кајак.мк.

Нејзината втора најголема љубов се планините. По долги години во кои сама пешачела, вежбала јога на чист воздух и ги практикувала техниките за свесност за да се наполни со енергија, Христина одлучила ова искуство да го понуди и на другите.

Она што започнало како прошетка со пријателите, денес е организирана активност која привлекува и локални луѓе и туристи кои трагаат по автентично доживување. За Христина, предизвици во овој процес речиси и да нема – кога работиш со љубов, патот самиот се отвора.

За да може да им даде енергија на другите, Христина најпрво се грижи за својот внатрешен извор. Нејзиниот ден започнува рано наутро, во 5 часот, со јога и пишување дневник. Оваа рутина ѝ овозможува да го задржи фокусот и со мир да се соочи со секојдневните предизвици.

Моментално, таа ги организира своите јога и хајкинг тури претежно за време на викендите или по договор, прилагодувајќи се на потребите на оние кои сакаат да побегнат од градскиот метеж.

Она што најмногу ја исполнува Христина во целата оваа приказна е токму трансформацијата кај луѓето која се случува за време на овие заеднички средби со природата. Таа вели дека е фасцинантно да се набљудува како учесниците, кои најчесто доаѓаат со едно расположение, по завршувањето на турата си заминуваат со сосема поинаков дух. Сведоштвото на тој премин – кога луѓето стануваат радосни, свежи, енергизирани и истовремено смирени – е моментот кој на нејзината работа ѝ дава најдлабока смисла.

Во овој нејзин пат, најголемата поддршка ја црпи од своите пријателки, но и од сè поголемиот интерес на луѓето за она што таа го нуди, што дополнително ја мотивира да продолжи да ја шири својата визија. За неа, грижата за себе не е само личен избор, туку одговорност која треба да ја практикуваме секојдневно. Христина верува дека само преку постојано учење и себенадградување можеме да бидеме вистински корисни и за другите околу нас. Јогата ѝ ја дава потребната свесност и виталност, додека планината е нејзиниот извор на здравје и чиста радост – нешто што несебично сака секој да го почувствува на своја кожа.

Иако плановите во животот често се менуваат, нејзиниот најголем сон останува ист – сите заедно да станеме поприсутни и посвесни за себе, за луѓето околу нас, но и за исклучителната важност на планините и заштитата на нашата планета.

За сите оние кои можеби во себе чувствуваат повик да започнат нешто свое, но сè уште се двоумат, Христина има порака која не треба да се игнорира. Таа советува да не се чека „вистинскиот момент“, туку веднаш да се почне со споделување на она што го имате во себе како дар. Повикувајќи се на познатото лого на Најк, таа едноставно вели: „Just do it“. Доволно е само да го направите првиот чекор, а патот сам ќе ви се открие, бидејќи токму самото патување е нашиот најголем и најважен учител.