Ратевските бамбурци: Приказна која се раскажува секој дваесети ден од јануари

Ако започнете од првиот јануарски ден да патувате низ Македонија, следејќи ги сите традиционални манифестации низ селата и градовите, верувајте дека ќе треба да патувате цел месец за да се запознаете со сите традиции и обичаи кои се одбележуваат од страна на локалните мештани.

Денеска, заедно со нашата локална авантуристика Сара Павловска која ги направи овие прекрасни фотографии ќе ве прошетаме до селото Ратево во Малешевијата. Во ова село, секој 20-ти јануари, традиционално се одбележуваат „Ратевските бамбурци“, каде локалните жители се маскираат и дефилираат низ селото со маски направени од животински кожи.

Како и сите други јануарски манифестации, така и „Ратевските бамбурци“ имаат своја симболика. За овој настан се верува дека го практикувале првите жители на Ратево, а мештаните за името „бамбурци“ сметаат дека е варијатна од „бабари“, додека повозрасните сметаат дека првото име за маскираните поворки бил „русалије“.

Ваквиот настан има пагански елементи, но се оддржува традиционално секоја година на празникот Свети Јован Крстител. Маскираните луѓе излегуваат на улица и дефилираат низ селото верувајќи дека на овој начин ќе го избркат злото од селото.

Она што е уникатно за настанот е начинот на кој се подготвуваат маските. Подготовката се прави во посебно одредени простории и од посебни дружини, но и во денови за кои православните христијани сметаат дека се „некрстени денови“ односно од Божиќ до Водици.

Секој учесник подготвува костум од животинска кожа, која е најчесто од овца или коза. Покрај шиењето на кожата, учесниците додаваат и рогови, ѕвонци и клопотарци.

Овие кожи се обработуваат со сол, а подоца се сушат. Целокупната подготовка може да трае околу две недели, а дел од костумите се тешки и до 70 килограми. Секој кој е присутен на настанот го шараат по лицето со „сажџи“, доколку бамбурците забележат дека некој од гостите не е маскиран доаѓаат и му го бојадисуваат лицето со црна боја.