Како е да се кампува на Преспанско езеро на есен?

Деновиве имаме одлично ноемвриско сонце. Преку ден топло, а навечер веќе се чуствува зимата. Меѓутоа не смееме да отстапиме од волјата за да продолжиме со авантуристичките патувања. Денеска ќе ве запознаеме со Бети Котовчевска, која на својот инста е позната како @_betika_.

Нашиот патувачки тим, за неа би рекол, дека е девојка која знае и умее да ужива во патувањето во секој период од годината. Со Бети ќе разговараме на две теми, едната е кампување на Преспанското езеро на есен, а другата е доста интересна тема, поврзана со прашањето: Како е да се плива во студени води? За втората тема бидете подговтвени да дознаете во текот на наредните денови. 

Бети вели: Есен во Ресен, како што зборовите се бакнуваат во рима, нашата Преспа во есен се претвора во една мала бајка преплетена со чист воздух, поле полно со ароматични јаболки и пејсажи кои те оставаат без здив.

Во ова време невреме, акцентот не ни сакам да го ставам на она што самите вести го прикажуваат, едноставно сликата за мене не е таква, во мојот ден едно нешто што не може да биде стабилно се само временските услови. Есента знае да биде непредвидлива и баш затоа ја сакам, знаете предизвик е да носиш заштитна опрема за минусни температури и костим за капење во исто време.

Секој слободен миг го користам да ги впијам последните зраци сонце пред зимата, да го гледам преспанското езеро како спие во прегратките на златно-жолтите планини и да заборавам на урбаното лудило.

Последно кампував во Отешево на местото викано Черти Камен, близу нашето езеро. Утрото беше тмурно, ветровито, а небото тешко, секој момент дождот беше неизвесен. Но сепак дождот ни треба на сите, не е непријател, само го осигурав мојот шатор со додатни тежини и останав цел ден. Чист воздух, топол чај, книга и пред мене недопрена природа.

Предноста на преспанските простори е што кампингот како таков не е многу застапен, и реткост е тука да забележите шатор. Но затоа, ќе се изнадишете чист воздух и ќе ги изнасликате пеликаните кои живеат на овие простори.

Есента личи на нас камперите, нема мирен дух, не знаеш на што си, каде си и до кога си. Таман ќе помислиш бура се спрема, знае да те награди со дупло виножито како мене во текот на престојот. Черти камен е локација со недопрена природа, блиску до неа се нашиот национален парк Галичица, Селото Стење и недопрената убавина на селото Коњско, баш затоа е добра почетна точка за кампинг.

Наполнете го вашиот ранец со храна и се што ви е потребно бидејќи најблиското село со продавничка е од прилика 8 километри оддалечено од местото кое колку што е диво толку е и убаво.

 За убав ден треба волја, недопрената природа е гратис!