Се преселив на Маврово каде на гостите им организирам активен одмор

Добри туристички приказни имало и ќе има. Особено ако тие доаѓаат од сопственици на приватни сместувања кои се дел од базата на Кајак.мк

Наша цел е да ја вратиме довербата кај патниците и сопствениците, да изградиме подобро заедништво и да докажеме дека секој може да престојува- насекаде.

Денеска ќе ве запознаеме со Влатко Томовски, сопственик на „Вила Јана“ која се наоѓа на Маврово.

Влатко е човек кој се одлучил да се пензионира предвреме, да го напушти Скопје и да се пресели на Маврово. Ни раскажува дека пространството на планината, скриените убавини, снегот и природата се предизвиците кои го поттикнале да се отсели од Скопје и да започне нов живот овде.

На местото каде се наоѓала старата викендичка со две спални соби што ја изградил неговиот татко, денеска тој има доградено шест студија. На почетокот немал намера ја издава вилата, но приказната за гостопримството се проширила, а со тоа и повиците од туристите кои барале да поминат некој ден на Маврово.

Денеска тој има своја мисија, а тоа е да ги запознае гостите со регионот на начинот на кој тој го познава. Вели дека иако ова место е познато по скијачкиот центар, сепак за него Маврово е подеднакво убав на пролет, лето и есен.

За да ја постигне таа цел, ја опремемува својата вила со велосипеди, кајаци и SUP даски. Вели дека секој гостин во вилата може еднаш да ги искористи бесплатно, бидејќи само на тој начин ќе може вистински да го почувствува регионот и придобивките од активниот туризам.

Влатко вели дека не е проблем да им овозможите на гостите да возат велосипед покрај езерото или пак да уживаат во кајак или на SUP даска. Многу е важно на тие луѓе да им се обезбедат соодветните инструкции и опрема.

Како искусен кајакар, практично ги запознава гостите со начинот на управување на кајакот или SUP даската. Детално ги запознава со езерото и им дели совети за тоа кои места се добри да се посетат.

За планинските велосипеди, пред се сака да ги процени гостите за тоа колку се искусни во возење, а потоа да им предложи патеки по кои ќе може да уживаат. Засега има на располагање десеттина велосипеди, 5 кајаци и 3 СУП даски со комплетни елеци, а вели дека постојано ќе се надоградува.

Влатко советува дека секоја планина носи свои предноси и опасности. Од тие причини тој се одлучил на своите гости и на сите други заинтересирани да им пружи еден вид на скратена обука и запознавање со ризиците и задоволствата што ги нуди активниот туризам.

Ни престојат пролетни и летни месеци со многу сонце и зеленила. Маврово е одлично место за да ја преселите вашата канцеларија во природа.

Дали можеби сакате да резервирате престој во вилата Јана? Тогаш запознајте се со повеќе информации со еден клик ОВДЕ.