Со нашето комбе истражуваме нови дестинации!

Февруари ни го појачува сонцето за неколку степени, денот ни го зголемува за неколку минути, а желбата за лето кај дел од нас за 100 проценти. Но нашиот тим отсекогаш настојувал да ви докаже дека не треба да го чекате летото за да патувате, бидејќи ако навистина го сакате патувањето, тогаш имате на располагање 365 дена од годината за да уживате во тоа што сте.

Доказ дека не треба да се чека летото за да се патува е проектот @adventure.trip.bus, млади луѓе кои си своето комби поминуваат километри уживајќи на места каде има недопрена природа.

По враќањето во Македонија започнуваат да истражуваат и разгледуваат комбиња, за на крај да се одлучат за WV T3 кое претходно служело како комбе за превоз на ученици до руралните средини.

Потребно било половина година за да го реставрираат и да го прилагодат како дом со мини-кујна, дневна соба во возење која се претвора во спална соба за спиење. Денешниот изглед на авантуристички Trip Bus за сите годишни времиња е осмислен и нацртан со идеја да се прикаже дека за патување не треба да чекаме да се стопли времето и со желба за авантури можеме да патуваме и кога врне и кога вее.

Едната страна на комбето е нацртана и обоена со мотиви од зима, скијачи и параглејдерист. Другата страна е лето, плажа со сурфери и пливачи. Илустрацијата е уникатна и единствена. Не станува збор за фотографија од некој патопис туку сопствена замисла и поставена цел да на секое патување откриваат нови дестинации кои не се доволно истражени.

Патувањето со Adventure Trip Bus не е само возење по мапа. Нивните патувања се спонтани, понекогаш траат и многу повеќе од планираната викенд-тура затоа што се случува попатно да наидат на поинтересна локација за кампување од испланираната. 

Од досегашните авантури може да се пофалат дека ги имаат посетено Балтичките држави како Естонија, Летонија, Литванија,  потоа Швајцарија, Унгарија, Словенија, Полска. Исто така имаат реализирано неколку месечно патување низ Италија, Сицилија и Малта, Франција, Турција, Грција, Босна и Херцеговина и други.

Тие додаваа дека на границата со Србија, полициските службеници започнале да ги прашуваат која им е нивната следна дестинација и се обидувале да им ја погодат.

Се надеваат дека во 2021-ва, границите ќе бидат отворени и ќе може да ги посетат Шпанија, Мароко и да кампуваат во пустина во нивниот апартман од милион ѕвезди.

До отварањето на границите, останува да ја истражуваат Македонија и да уживаат во омилените места како Козјак, Маврово, Охрид и Галичица, Преспа, како и нетолку познатите село Белица во Македонски Брод, Зовиќ во Мариово, врвот Рамно на Скопска Црна Гора, реката Бабуна со планинарење на нејзините извори.