Есенска гастро дестинација: Гостилница „На валајци“

За патувачите- метереопати кои никако не можат да го прифатат завршување на летото и почетокот на есента, тимот на Кајак.мк чувствува одговорност да им изнајде милион предлог дестинации, со кои ќе докажеме дека есента има своја убавина и дека секое годишно време треба да го уживаме со своите предности.

Нам како особено драга есенска дестинација која им ја препорачуваме на сите патувачи е село Слоештица, Демирхисарско. За многумина познато како родното место на Петре М. Андреевски.

Селцето се наоѓа на околу 800 метри надморска височина, опколено со густа дабова шума од Плекенската планина и одличен терен за есенски прошетки и фотографирање на златните бои на есента.

Есента има свој специфичен мирис. Доколку одлучите да го посетите селото, наш совет е пешачете подолго време во природа, како би го почувствувале мирисот на свежиот планински воздух и паднатите лисја.

По завршувањето со прошетката, нашиот тим ви препорачува да ја посетите гостилницата „На валајци“, која е правото ехо на минатото за валавиците и водениците.

Гостилницата е изградена во карактеристичен македонски етно стил, а во комбинација со природата ќе ви помогне да заборавите на проблемите и стресот. Овде поминува „Бела Река“, нејзиниот шум додека вие уживате во гостилницата ќе го надополни задоволството.

Она што е уникатно за гостилницата е силното гргорење на водата од Бела Река која паѓа од високо, по две букови цевки, влегувајќи во вртолог кој води до селото.

Ваквите валавици и воденици се изградени во 19-ти век и имале намена да валање на јамболии. Во тогашното време валањето се правело за ресата од ткаената јамболија да се развласи и да се стегне. Денеска домаќините на гостилницата велат дека валавицата во нивната гостилница е останата како примерок кој сведочи за традицијата и начинот на живот од пред втората светска војна.

Во Ресторанот може да вкусите свинско и јагнешко печено во фурна на дрва како препорака од тимот на Кајак.мк

Гостилницата„На валајци“ од денеска е дел од базата на Кајак.мк, а доколку сакате да ја погледнете точната локација и да добиете контакт за резервација, кликнете ОВДЕ.