Се заљубив во риболовниот спорт уште на 10 години

Никогаш нема да ви е достадно во животот ако сте риболовец во Македонија. Од една страна ќе бидете во постојана акција и авантура, а од друга страна, слободното време дома ќе може да го надополните со гледање едукативни емисии поврзани со рибите.

Фото: Endri Killo

Македонија е рај за рибарите. Без разлика што не излегува на море, таа има брзи реки, огромни езера и вештачки брани кои се предизвик за секој љубител на риболовот. Во Македонија има многу страсни љубители на риболовот. Доколку тргнете по течението на реката Вардар, од северот па се до југот, вие ќе запознаете многу луѓе кои ќе ви ги раскажат животните приказни и како се заљубиле во спортот.

Луѓето кои се одлучиле за овој спорт, ние ги ставаме во посебна категорија. Тоа се луѓе кои се одлучиле да му се препуштат на спокојот и поголемиот дел од живот да трагат по мир и тишина.

Во централниот дел на Македонија, живее Лазар Рибарски. Лазар живее и работи во Градско. Доколку појдете овде, ќе сфатите дека скоро сите жители го познаваат. Позитивна личност која слободното време наместо на социјалните мрежи го користи за риболов. Лазар вели дека така го пронаоѓа мирот. Овој спорт му помага да побегне од секојдневниот метеж и да ужива покрај Вардар.

Ни дели дека во риболовот се заљубил на 10 години. За него ова е љубов на прв поглед. Започнал да го учи спортот од неговиот татко и со трската на неговиот чичко, бидејќи во тоа време не поседувал сопствена.

Денеска тој е искусен рибар. Посветен е на изучувањето на рибите и нивниот начин на живеење. Лазар вели дека ова е скап спорт. Треба опрема, легална дозвола, почитување на правилата и ред други работи.

 
Фото Жарко Трајаноски

Тој вели дека обожава да се расправа со рибите грабливци и затоа лови со спин. Омилена река му е Вардар и не би ја заменил со друга. Кога нивното на реката е високо, тогаш заминува на Дојранското Езеро кое изобилува со црвеноперка и карас. Тиквешкото езеро го сака поради крапот и кленот, а вели дека Дрим е исто така доста богат со риба. Западниот дел на Македонија го сака и поради прекрасната природа.

Најголемата уловена риба му достигнала 32 килограми. Рибите кои ги лови ги приготува во својот ресторан во Градско кој го носи називот „Кај Лаки“. Ресторанот се наоѓа во самиот центар, а каде може да ги вкусите неговите специјалитети подготвени по рецептите на кујната.