Престојувајте во куќа прогласена за културно наследство од 19-ти век

Кајак.мк значи патување, приказни, култура и историја. Нè радува фактот дека се повеќе домаќини ги отвораат своите врати за нашиот свет и дека се повеќе расте интересот кај патувачите да престојуваат на места каде што ќе може да добијат уникатно искуство и допир со историјата на областа.

Денеска, разговаравме со Симона, девојката која ги отвори вратите на „House of Sokolovi“ куќа која се наоѓа во стариот дел на Кратово, а која е прогласена за културно наследство бидејќи има типична македонска архитектура и е изградена во 19ти век. Куќата има интересна местоположба, практично виси над Манцева река и е една од највпечатливите куќи во Кратово. Реновирана е во 2021, а мебелот внатре е уникатен, рачно изработен од масивно дрво, без штрафење.

Без разлика што куќата е реновирана, задржани се сите одбележја на една стара традиционална македонска куќа. Прозорите се на нестандардна висина. Дневната се наоѓа на типичен македонски чардак, дворот е опремен со преубава клупа со маса, и преубав поглед на типични Кратовски куќи и Манцева река.

Симона вели дека куќата е на само 2-3 минути пеш од центарот на Кратово. Во соседството живеат постојани жители на Кратово, има семејни куќи, а на соседната улица се наоѓа црквата Св. Јован Отсечен.

Оние кои досега не го посетиле Кратово, совет на Кајак.мк е да го сторат тоа во секој период од годината. Градот има своја уникатна историја, а во него може да се најдат локални херои кои вреди да ги запознаете.

Во околината на Кратово се ноѓаат Камените кукли, Лесновскиот манастир, Кратовските Кули, планината Лисец и уште многу атракции кои може да ви го пополнат активниот викенд.

Доколку сте заинтересирани за повеќе информации, фотографии и контакт за резервација, кликнете ОВДЕ.