Започнавме со една икона за подарок, а сега имаме огромен број резбарски дела

Кога сме кај туристичките приказни од луѓето кои прават мали нешта со огромно значење во развојот на туризмот, тимот на Кајак.мк се одлучи месец Март да го посвети на жените хероини кои творат во Македонија. Мина заедно со нејзиниот сопруг Марјан може да се пофалат со многу ракотворби. Она што тие го практикуваат во 21-ви век е резбарството. Мина вели дека во периодот пред да почне со резбарството нејзинито маж постојано сонувал дека еден ден ќе ја работи ова професија.

Денот кога требало да подарат икона во манастирот Св. Спас во Кавадарци, биле ограничени со финасии и се решиле иконата да ја изрезбат на дрво. Подоцна истиот поп од нив бара да се изработи дрвен крст кој ќе се користи за „Водици“

Овие два геста ги натерало да се посветат на резбарството и во краток период да поклонат многу икони резбани на дрво. Она што е интересно е фактот дека Марјан имал искуство само како столар, но со верба во себе и дарба за резбање успеваат да изработат сувенири и производи од дрво.

Мина вели дека резбата на дрво им овозможила да се чувствуваат исполнети со љубов и среќа која што сакаат да ја споделат и подарат на сите околу нив. Овој занает го усовршуваат од самите почетоци на 90-те години па се до денес, внесувајќи им на резбите македонски мотиви.

Марјан потекнува од Мијачкиот дел каде воедно излегле најдобрите резбари и фрескописци на Македонија. Татковците им биле врвни столари, па оттука и преработката на дрвото може да се каже дека е семејна традиција.

Ги запрашавме со кои проекти најмногу се гордеат од досега сработеното?

Мина одговори дека нивните ракотворби и дела ги има во многу цркви и манастири. На пример: Иконостасот во Св. Петка Младо Нагоричане, Св. Троица во село Скачковце, Св. Димитрија во Сушево, Св. Јован Струмичко.

Покрај религиозни објекти, нивните дела може да се сретнат и во многу угостителски објекти и винарии, како: Тиквеш, Попова Кула, Шато Сопот, Дисан Венец, Пешкови Винарија и други.

Како најзначаен проект го издвојуваат изработката на царските двери и порталот во црквата Св.Ѓорѓија во Лазарополе. Старите дизајни биле украдени и морало да се изработат нови - идентични на старите (реставрација) . За среќа пред да бидат украдени, нивната ќерка се фотографирала со нив и од таа фотографија успеале да изработат идентични на нив.

Во 2019-та година резбарницата „Зингибер“ ги отвори вратите за туристите. Тие промовираат иновативен бизнис кој пред се служи за чување на културата и гастрономијата.

Целта на „Зингибер“ е да ги запознае посетителите со традицијата на македонската резба на посебен и уникатен начин. Проектот го предводи 30 годишното искуство на Марјан Милев заедно со Мина Милева. Туристите доаѓаат во ателјето каде има изложено поставка од резби. Овде имаат шанса да ја слушнат приказната за почетоците, да ги видат уникатните дела и лично да искусат и пробат резбње, а сето тоа исполнето со традиционални македонски специјалитети од домашно еколошко и сопствено производство. Туристите воглавно се воодушевени и импресионирани од автентичноста на она што им се нуди. Ова за нив е ново и уникатно.