Мапа на специјалитети: Слатко од диви смовки- вкус на југоистокот

Овој последен депресивен период од месец март, кога сите чекаме да „пукне“ сонцето, одлучивме да го посветиме на храната која е популарна во разни региони во Македонија. Можеби немаме многу сонце, но затоа пак ќе имаме микс на вкусови.

Како носталгичари по јужните предели на Македонија, одлучивме да започнеме со специјалитетот на Југоистокот.

Вие кои во моментот го читате текстот, сигурно веќе сте слушнале за „Слаткото од диви смокви“, а повеќето од вас и го имаат вкусено. Ваквото благо задоволство традиционално се произведува во општините Гевгелија, Валандово, Богданци и Дојран, каде изобилуваат дивите смокви.

Низ минатото, вообичаена задача на мажите во семејствата била да појдат во берба на малите зелени плодови во периодот кога тие почнуваат да созреваат, а додека пак жените биле одговорни за чистење на смоквите и подготовка на слаткото, па се до самото вакумирање во теглата.

За оние коишто не почувствувале на сопствена кожа, треба да знаат дека производството на „Слатко од диви смокви“ е долг и макотрпен процес. Бербата на смоквите не е воопшто лесна и едноставна, ако се земе предвид карактеристиката на листот на смоквата и нејзината структура на раст и ширење на гранките од стеблото.

Што се однесува пак до процесот на производство, се започнува со варењето на овошјето и до десет пати се со цел да се отстрани горчливиот млечен слој што го има плодот, за потоа да се додаваат во шербетот.

Вообичаено се додава сок од лимон или лимонска киселина, се со цел смоквите да ја задржат својата карактеристична боја и форма. Откако ќе заврши процесот на подготовка, слаткото завршува во стаклена тегла која се чува на полиците во домовите. 

Слаткото од диви смокви во Македонија често го произведуваат за домашна употреба. Доколку појдете на југот од државата и престојувате во некое домаќинство, бидете сигурни дека некои ќе ве послужат со слатко додека го пиете кафето. Ретко може да се забележи дека некои семејства го комбинираат со сладолед или во палачинки.