Германија: Од 15 јуни дозволено патување во европските земји

Шефот на германската дипломатија Хајко Маас, појасни дека сепак дополнителна одлука ќе биде донесена за Шпанија која е се уште меѓу главните жаришта на заболени од коронавирусот. Дополнително, како што кажа тој, земјата се отвора и кон Велика Британија, Норвешка и Швајцарија. Сепак, доколку бројката на заболени во некоја од овие држави надмине 50 заболени на 100 илјади жители, тогаш рестриктивните мерки ќе бидат повторно вратени. Маас појасни и дека во моментов нема одлука за отворање на границите со држави кои не се членки на ЕУ.

-Ова не беше лесна одлука за нас, ја донесовме по долги интензивни дискусии со нашите европски партнери изминатите денови и недели. Но, мерките се намалуваат постепено насекаде. / За трети држави, ја чекаме одлуката на Европската Комисија оваа недела, дали ќе бидат продолжени рестрикциите за влез во Европската Унија од трети држави, истакна Хајко Маас – Министер за надворешни работи на Германија.

Италија пак која изминатиот период беше една од најзафатените земји на европско тло по бројката на заболени и починати од коронавирусот, од денеска ги отвора регионалните граници во својата држава. Со ова се овозможува поголема слобода на движење за повеќе од 60 милиони жители на земјата, а од денеска е дозволен и влез на државјани од шенген – зоната, без карантин. Од регионот пак, Србија, Црна Гора, Албанија и Србија веќе ги отворија своите граници, а Грција се очекува тоа да го стори на 15 јуни.