Дали сте слушнале за Леонов Двор: Дестинација каде можете да јавате магариња?

Во Македонија има доста уникатни рурални дестинации, за кои повеќето млади во државата се уште немаат слушнато. Кајак.мк како платформа која добива се поголем замав во државата има една поставена цел, а таа е да им ги презентира сите убавини на Македонија на новите генерации, како би ги поттикнале да бидат туристи во својата татковина.

Ние секогаш го велиме следното: Летниот одмор можете да го искористите надвор од државата, каде и да посакате, но викендите и слободните денови искористете ги за прошетки и престојување во Македонија. Новото мото во 2023-та година ни гласи: Бидете туристи во обувките на локалните жители. Па оттука, да видиме што може да правиме за време на викендите:

Наша нова препорака за уникатно и несекојдневно патување е „Леонов Двор“. Гастро дестинација која се наоѓа во селото Куратица. Идеална дестинација за фамилијарни прошетки, тим-билдинг патувања и престојување.

Оние кои за првпат се соочуваат со селото „Куратица“ треба да знаат дека оваа селце се наоѓа на 20 километри североисточно од Охрид или на 5 километри од самиот пат Охрид- Ресен. Куратица има свои прекрасни предели, а мештаните на селото се особено горди на планинскиот масив Мазатар од каде можете во исто време да ги гледате Охридско и Преспанско езеро. Селцето е сместено на 1080 метри надморска височина, а ние го сакаме поради тоа што успеало низ минатото да ја задржи својата автентична традиција и да ја негува и ужива природата.

Денеска на сред село ќе го најдете леоновиот двор, кое како гастро дестинација нуди одлична можност да побегнете од градскиот метеж и да уживате во традиционалната храна, или можеби пак да појдете на прошетка со магариња.

„Леонов Двор“ има капацитет да нагости 50 лица, а овде може да ги вкусите специјалитетите како ѓомлезе, комат, питулици, но и качамакот или бакрданикот.

Повеќе информации за ресторанот, точна локација и контакт за резервација можете да најдете со еден клик ОВДЕ.