На мојата едрилица во Струга се случиле безброј запросувања

Ако романтиката имаше име со сигурност би се викала Охридско Езеро, вели Ѓоко Гучески од Струга кој е член на едриличарскиот клуб Снегар и јахтинг клубот Сирма од Струга.

Ѓоко е жив сведок на многу љубовни романси кои се испишуваат на неговата едрилица која се користи за туристичка промоција на езерските локалитети.

За Кајак.мк тој ги раскажува неговите почетоци. Заљубен во езерската шир, со неколку ентузијасти одлучиле да одвојат приватни средства за изградба на сопствени едрилици. Во изминатите пет години, со полагање за лиценца за туристички водич, Ѓоко развил тури за претставување на убавините на Охридското езеро кои вклучуваат посета на многу културно историски споменици, нуркања, капење во езерото и романтични доживувања.

Информативните тури вклучуваат посета на повеќе локални дестинации, а авантурите најчесто започнуваат од Струга. Се посетуваа Калишта каде се наоѓаат црквите Света Богородица од 14ти век и Свети Атанасиј од 15 век.

Ѓоко вели дека покрај романтичките моменти кои ги овозможуваат крстрењата, важно е да се напомене дека на овие тури се учат многу важни информации. Секој ќе може да ја погледне иконата на Света Богородица од 18-ти век каде ликовите на Света Богородица и Исус се претставени во темна боја, а се смета дека е една од ретките икони во светот.

Од другата страна пак, за време на пловењето честопати се организираат нуркања на локалитетот Врбник, каде на само 2-3 метра длабочина може да се види и да се допре историјата стара 3500 години, вели Ѓоко.

За оние романтичарите се организираат едрења на зајдисонце. Со шампањ во рака и романтична музика во позадина патниците се пропуштаат на залезот на сонцето и раѓањето на месечината.

Ѓоко е сведок на многу запросувања за време на едрењето. Ова му е од особено задоволство поради фактот дека младите ги користат несекојдневните начини за уживање во Македонија.
Не се исклучуваат ни честите ,,тим-билдинг" крстарења кои во минатото тој ги организирал претежно со странски туристи, но денес ова е пракса и за домашните туристи.

Ѓоко додава дека од досега организираните пловидби нема забелешки, а гостите си заминуваат задоволни со позитивни импресии и намера да се вратат повторно и наредната година.