Не очекував моето вино да ја добрие Гранд При наградата за најдобро оценето вино

Сончевите денови од месец февруари ги искористивме да испиеме едно кафе со Александар Кимов. Човекот кој стои позади винскиот бренд „Кимов“ кој годинава му ја донесе „Гранд При“ наградата за виното „Темјаника берба 2021 година“.

Александар е среќен за наградата, но признава дека не очекувал ова да се случи. За Кајак.мк раскажува дека уште во самата ферментација неговиот тим бил свесен дека виното е со врвен квалитет, но дека ќе добијат награда за најдобро оценето вино, никој не ни помислил.

Ваквите награди се доделуваат на интернационален натпревар од комисија во состав на реномирани енолози под раководство на професор Михаил Петков.

Награда се должи на најдобар оценет пијалак од бели, црвени и розе вина, ракии, вињаци и мастика од сите категории заедно.

Виното „Темјаника 2021“ е оценето според: Оригиналноста, нијансата на боја, интензитетот на боја и мирис, префинетоста, хармоничноста, оригиналност на вкус, интензитет на вкус, хармоничкост на вкус, постојаност на вкус и после вкус.

Александар вели дека признанието му потврдува дека е на прав пат. Отсекогаш посакувал да го работи ова што го работи денес. Вели дека во Тиквешијата производството на вино е ритуал со кој живеат бројни генерации. Занаетот го печел кај неговиот татко, го набљудувал и му крадел од знаењето. По дипломирањето одлучил да ја продолжи семејната винска традиција и да ја преземе одговорноста околу производството на вино.

За него најголема мотивација се задоволните консументи кои уживаат во виното. Како секој млад и амбициозен винар и Александар сонува за развој на винската приказна. Вели дека има визија и големи планови. Од неодамна започнал да организира вински дегустации и презентација на вината. Сето ова надополнето со кетеринг услуга.

Доколку сакате да стапите во контакт со Александар, тоа ќе може да го сторите на 075 379 316, а наскоро неговите производи ќе се најдат во нашата Кајак Бакалница.