Дедо ми беше активен планинар, а денес јас ја продолжив неговата традиција

Дел од нашите патувачи со трпение очекуваат да заврши зимата, а останатите знаат како да уживаат во нејзината лутина.

Меѓу оние кои знаат да ги искористат благодетите на зимата е Елеонора Димковска. Уште една наша локален хероина кој ги мотивира младите да се заљубат во активниот туризам на планина.

За Кајак.мк вели дека е студент на факултетот за безбедност во Скопје. Луѓето ја познаваат како Нора, девојката која веќе 15 години тренира гимнастика.

Во планината е заљубена од мали нозе. Главен виновник за нејзината љубов кон планината е нејзиниот дедо кој бил активен планинар и честопати ја водел на планинарење. Со годините и нејзината независност од дома, Нора одлучила да ја продолжи традицијата на сопствениот дедо и да го посвети живтото на нови авантури.

Планинарењето и било секогаш помеѓу приоритетните работи, но вели дека со активно планинарење се занимава од почетокот на пандемијата. Најголема мотивација и се луѓето кои ги среќава на планина. За нив вели дека се многу поразлични од луѓето во градот. Сите се позитивни и секогаш расположени за другарување, а како втор важен фактор го истакнува чистиот воздух и погледот кој го нуди планината.

Заљубена е во „Националниот парк Пелистер“ и најмногу време поминува овде. За неа Пелистер нуди неверојатен поглед кој ја исполнува.

За оние млади и заинтересирани лица коишто во моментот го читаат ова четиво, Елеонора вели дека треба да знаат оти на планина никогаш не се оди сам. Покрај убавините, планината има и свои опасности. Секогаш треба да практикуваат планинарење со искусен планинар и да ги слушаат неговите совети.

„Главната причина за тоа што денес сум активна планинарка е тоа што го сакам здравиот начин на живот и позитивните луѓе кои секојдневно ги запознавам на секоја моја авантура и се разбира искуството, адреналинот и забавата што ни ја нуди планината“, вели Нора.

За неа секоја авантура си носи своја посебна приказна, но ако треба да издвои нешто кое го обожава во зима е симнувањето од врвот со лизгање. Ваквиот адреналин го буди детето во себе, а тоа е најпозитивното нешто што може да им се случи на ,,возрасните".