Во Македонија се наоѓа колибата на Александров во која секојдневно се изработуваат вкусни видеозаписи

Опколена со прекрасна густа шума на планината Плачковица, во близина на селото Лаки се наоѓа една мала скромна куќарка во која нашиот нов локален херој Иван Александров подготвува разни специјалитети од локални состојки и на таков начин го промовира туризмот во својот роден крај.

Приказната за alexandrovshut започнала да се развива на 800 метри надморска височина на местото викано Гиговица или Бигланска Нива.

Тимот на Кајак.мк стапи во контакт со Иван кој од денеска е дел од нашата листа на локални херои кои прават мали нешта од огромно значење за развојот и промоцијата на туризмот. Видеозаписите кои ги споделува Иван на инстаграм профилот alexandrovshut имаат цел да ги доловат сите моменти од приготвување на традиционална храна со локални намирници, а исто така има доста инсерти од самата природа која ја опкружува „Колибата на Александров“.

Самата планина и самите природни убавини коишто ги поседува овој предел на Македонија претставуваат еден „fast charger“ од динамичниот начин на живеење, вели Иван и додава дека планинаската колиба е стара половина век, поточно таа е изградена во 1972 година.

Колибата ја гради неговиот дедо, а денеска Иван има направено мали корекции кои му овозможуваат да поминува поголем дел од своето слободно време на планина.

Иван се надева дека во скоро време куќарката ќе може да се издава на авантуристите кои бараат мали и едноставни планински колиби изградени пред се од природни материјали, а каде ќе ја имаат слободата сами да приготвуваат храна, да планинарат или пак да бидат барем еден ден отцепени од динамичниот и напорниот начин на живеење.

Неговиот инстаграм профил можете да го најдете како alexandrovshut, а исто така и тимот на Кајак.мк во престојниот период ќе споделува видеозаписи кои ги изработува Иван.