Преку пешачење промовираме туризам во Берово!

Берово има сонце во декември. Сонцето во комбинација со чистиот воздух е причина поради која треба да излеземе и прошетаме во беровската околина. Нашиот тим денеска ве запознава со Pathfinders, млади ентузијасти кои го искористија декемвриското сонце за да реализираат пешачка тура која верувале или не имаше 36 учесници. 

Како што велат тие, слободното време го користат за да организираат „пешадија“ низ малешевијата, на кој начин ќе ги запознаат локалците со убавините на регионот.

Нивната промотивна планинарска тура беше под називот „Малешевијата во доцна есен“ која имаше за цел неформално да ги запознае учесниците во турата со природните убавини на регионот.

Цели пет часа пешачење и 13.5 поминати километри за да може да се ужива во тоа што се нуди. Од Pathfinders велат дека на 9-тиот километар направиле пауза во викендица каде на дворна маса дегустирале греена ракија и домашно кафе. 

Најмладите учесници на турата има само 17 години, што на некој начин ни ја дава надежта дека ваквите пешачки тури ќе се развиваат во традиција.