Пандемијата ми даде шанса да научам да изработувам кошници од хартија

Уште една хероина која докажува дека хобито може да ви донесе дополнителна заработка и дека ваквото хоби ќе ви го исполно слободното време со креативност и забава.

Кајак ве запознава со Даница Несторовска од Скопје. Жена љубител на пешачењето, планинарењето и хортикултурата, а која нејзините пријатели ја познаваат по нејзината ведрина и насмевка.

Како љубител на археологијата и архитектурата, Даница отсекогаш ја привлекувал процесот на создавање разни предмети. Секогаш била фасцинирана од старите предмети изработени од глина, а кои биле пронајдени на археолошки локалитети, што на некој начин ја поттикнува да отпочне со изработка на предмети на кои ќе може да го стави својот потпис.

Денеска, Даница може да се пофали со рачно изработените плетени корпи и украсни предмети. За предметите вели дека се 100% рачно изработени бидејќи процесот започнува од парче хартија кое се намотува како стапче и со повеќе намотани стапчиња започнува процесот на плетењето. Таа работи со акрилни бои и лакови за да може предметите да се користат за складирање храна.

Бидејќи целта на изработените предмети е да завршат во домаќинствата, користи чиста хартија која ја набавува од разни производители, а при производство користи лепак, аркилни бои и лакови од книжарници.

Вештината ја научила за време на пандемијата, кога сите бевме ограничени со движење, гледајќи видеа на Youtube. Фасцинирана од видеозаписите, решила да започне со изработка на нешто слично. По многу неуспешни обиди и голема упорност и многу потрошена хартија и нервоза, успела да изработи корпи на кои била горда и кои денеска ги користи за лична употреба. Првите изработки добиле доста позитивни коментари од нејзините пријатели, со што интересот за вакви производи почнал да расте, со што денеска нејзиното хоби е пораснат во мал бизнис наречен DBasketry.

Рачната изработка во комбинација со комплексните детали привлекуваат огромно внимание, како и тоа дека се изработени од хартија, а не од дрво како што наликуваат на прв поглед. Даница смета дека и еколошкиот фактор е значајна точка. Нејзините производи може да ги најдете на DBasketry, а и наскоро во новата база за пазар на Кајак.мк