Од Скопе до Стенче со велосипед!

За оние кои не ги попречува годишното време да се качат на својот велосипед и да поминат добра викенд авантура, им го препорачуваме селото Стенче. Туртата може да ја организирате од Скопје преку Стенче па се до Милетино и назад во Скопје. Вкупно 120 километри и 1350 метри елевација.

Туртата ни ја препорака Јорданчо Цветаноски кој веќе подолго време е еден од нашите активни „вело водичи“ кои ги истражува убавините на Македонија со својот велосипед. Заедно со Коста Шимбов ни испраќаат фотографии, кои може да бидат ваша мотивацја за добра викенд авантура.

Кога ќе го напуштите Скопје, и од десната страна на регионалниот пат Тетово- Гостивар од густата шума на Сува Гора се наѕира селото Стенче. Ова е симпатично месот полно со цркви и живописна приказна околу себе. Јорданчо вели дека се запознале со локални мештани кои се во поодминати години, но со насмевка ги пречекле и поздравиле.

Огромни дупки на паднати тавани и греди беа остатоци на неколку куќи, додека пак останатите се реновирани и во добра состојба. Дел од стенчевци се занимаваат со сточарството, а дел со земјоделство, вели Јорданчо. 

Пауза за ручек направиле високо над селото, кај црквата Св. Петка, хедонизирајќи на ноемвриското срамежливо сонце.

Она што тој го напоменува е да внимавате на краткиот ден, бидејќи навечер е доста студено, па да го организирате времето за враќање назад. Тие преку Милетино и Стримница се вратиле во Скопје.