Дали сте ги посетиле водопадите во Камењане?

Ни доаѓа викенд, а обврска на тимот на Кајак е да Ви сподели предлог викенд- дестинација каде вашето пасивно слободно време ќе го исполните со многу активности. Фотографиите кои ги користиме во информативниот текст се преземени од инста профилот на: goonerskmk

Дел од нашите патувачи сигурно веќе ги имаат посетено прекрасните Камењански Водопади, а за оние кои за првпат се среќаваат со овој поим, денеска е денот „Д“ кога треба да ви откриеме некоја информација повеќе.

Овие водопади се идеални за луѓето авантуристи, вљубениците во природата и секако за активните планинари кои наместо да искачат некој врв, ќе одлучат да се нурнат во густ шумски предел.

Ајде да започнеме од поаѓањето.

До водопадите може да пристигнете по следната рута: Пред се треба да возите до истоименото село Камењане, кое се наоѓа во Полошката Котлина, од десната страна на автопатот Гостивар- Тетово или пак, на околу 7 километри од Тетово.

Причината поради која секој би се заљубил во Камењане, е само една, а тоа е Шар Планина. Планина која никого не остава рамнодушен. Кога ќе пристигнете во селото, продолжувате по коритото на реката каде имате асфалтен пат, се до селото Јеловјане каде имате информативни табли и маркици кои водат низ буковата шума.

Овде ќе наидете на 8 водопади кои секој блика со своја убавина. Непосредно пред првиот водопад имате стара воденица каде мештаните на селото го мелеле житото, а веднаш потоа ќе наидете на скалила поставени се со цел да се олесни движењето низ реката. По течението на реката ќе наидете на многу дрвени мостови, прекрасни глетки, прекрасни скриени местенца каде ќе сакате да останете цел ден.

За оние кои не се доволно кондиционо подготвени не треба да водат грижа бидејќи до водопадите имате прецизно обележана патека, урбанизирано со скали и мостови кои ќе ви помогнат во рок од 2 часа да ги видите сите 8 водопади.

Фото: goonerskmk на инста