Дрвениот мост на село Кожле: Атракција за сите љубители на добрата фотографија

Кожле се наоѓа во областа Блатија на десниот брег на реката Пчиња. До селото Кожле се стига по автопатот Скопје-Велес. Пред селото Катланово се врти десно, по асвалтиран пат кој поминува низ селото Блаце. Патот ја сече густата дабова шума кој ќе ве одведе право во селото.

Доколку Indiana Jones се снимаше во Македонија, пишува Марко Џамбазоски (insta: @markodzambazoski) адреналинскиот мост во селото Кожле би била неизбежна снимачка локација. За да го преминете овој висечки мост потребно е малку повеќе храброст и стабилен чекор, бидејќи се ниша и крцка на секое движење.

Познат е и како Стојанов мост, именуван по жителот на селото кој го изградил, меѓутоа на дел од мештаните не им беше драго што им го спомнавме ова име, па ни кажаа дека мостот е заеднички изграден од неколку фамилии кои живеат во селото и токму името на мостот било причина за расипување на односите помеѓу овие фамилии. 

Како и да е, овој мост, опкружен со недопрена природа, нуди уникатно и несекојдневно доживување и вреди да се посети.