Изработувам рачни украси и предмети од дрво, нешто кое во Македонија се работи ретко

Бакалницата на Кајак.мк ја добива својата 29-та тезга која нуди уникатни дрвени изработки. Денеска ќе ве запознаеме со Јованче, чии изработки можете да ги погледнете и да ги нарачате со еден клик ОВДЕ.

Јованче има уникатна приказна поради фактот дека тоа што го работи во Македонија е слабо застапено како занает, а може да се каже дека нема нови генерации кои се фокусираат да го држат во живот ваквиот занает.

Роден во 1978 година, велешанецот е гитарист во панк рок бендот Оловна Рестрикција. Со занаетот започнал да се занимава пред 3 години, а како што вели тој, почетоците му биле хоби за исполнување на слободното време.

Во моментот кога неговата сопруга споделува фотографија на социјалните мрежи од негова изработка и по одличната реакција на луѓето, Јованче сваќа дека неговото хоби може да биде многу повеќе од тоа.

Денеска, неговите изработки имаат две улоги. Едната е да поттикнат среќа кај купувачите или кај оние што ќе ги добијат за подарок, а втората е едукативна улога која има цел да едуцира нови генерации за рециклирањето и користењето на веќе постоечки стари предмети.

За да се комплетира една изработка, Јованче користи старо дрво кое според него има добро минато и душа, а исто така користи стари шрафови, рециклиран материјал, бои, лакови и се што ќе му падне на ум дека може да се вклопи во замислената приказна.

Уникатноста ја доловува по тоа што изработките не се сериски изработени и по фактот дека во Македонија има многу мал број луѓе кои се заминаваат со ваквата занаетчиска гранка. Сите изработки се различни, а при нивна изработка често ги зема предвид и барањата на купувачите.

Доколку сакате да ги погледнете изработките на Јованче и да нарачате дел од нив за вас или како подарок за вашите најблиски, кликнете ОВДЕ.